ءقازىر بۇكىلرەسەيلىك ينتەرنەت كوزدەرى ياكۋتسكىنىڭ مەرى بولعان ساردانا اكسەنتيەۆا تۋرالى تولعانا جازىپ جاتىر. شىندىعىندا قىزمەتىنە كىرىسكەنىنە ءبىر ايدان ءسال  اسسا دا،  ونىڭ كوزقاراسى ەرەكشە بولىپ وتىر.

جالپى «قىس ياكۋتيادان باستالادى» دەگەن ءسوز تىركەسى بار. بۇل راس. ساردانا قىزمەتىنە كىرىسە سالىسىمەن ەڭ الدىمەن قىستا جولعا اسفالت توسەيتىندەرگە تىيىم سالدى. ەكىنشىدەن،  بۇكىل اۋلاعا كىرىپ، ءوز اياعىمەن جۇمىستى تەكسەردى. قۇرىلىس وكرۋگىنىڭ باسقارماسىنا كىردى. جۇمىستا 15 ادام بولۋى ءتيىس بولسا، ونىڭ 13ء-ى جوق. بىرەۋى ماساڭ كۇيىندە وتىرعان. ءبارىن جۇمىستان قۋدى.

ۇشىنشىدەن،  وسى ۋاقىتقا دەيىن بۇكىل جەرگىلىكتى شەنەۋنىكتەر ءمىنىپ جۇرگەن اسا قىمبات شەتەلدىك كولىكتەردىڭ ءبارىن ساتتى. كەرەگى جوق جيىندار مەن ورتالىققا ءجونسىز باراتىن شەنەۋنىكتەردىڭ ءىسساپارلارىن كۇرت قىسقارتتى.

سايلاۋ كەزىندە ءپۋتيننىڭ «ەدينايا روسسيا»  پارتياسىنىڭ اتىنان سىنعا تۇسكەن باسەكەلەسىن جولدا قالدىرىپ، مەر بولعان ايەلدىڭ ارەكەتى شىندىعىندا شىنايى.  اتقارعان جۇمىسى اڭىزعا اينالىپ بارا جاتىر. كوزقاراسى حالىقتىڭ كوڭىلىنەن شىقتى. ءبىراق اقيقاتتى قايتپاي ايتاتىن مۇنداي قايسار ايەل كىمگە ۇناي قويسىن؟! حالىقپەن كەزدەسىپ تۇرعان ساتتە قارسىلاستارى ونىڭ بەتىنە بوياۋ شاشتى. جۇمىرتقا لاقتىردى. ءبىراق ساعى سىنباعان ساردانا كەرى شەگىنگەن جوق. ءقازىر  قالانى سىبايلاس جەمقورلىقتان تازارتىپ جاتىر.

ەكى وقۋ ورنىن ءبىتىرىپ، ياكۋتيادا ءارتۇرلى قىزمەتتە كاسىبىن جالعاستىرعان ول 2012 جىلى قالا مەرىنىڭ ورىنباسارى بولىپ جۇمىس ىستەدى. باسشىسىمەن كەلىسپەدى. اقىرى وسىدان بىرەر اي بۇرىن وتكەن سايلاۋدا جەڭىسكە جەتتى.  ءقازىر «حالىقتىڭ اكىمىنە» اينالدى. ول – ەلدىڭ ورتاسىندا. كابينەتىندە وتىرمايدى. ەلمەن ەتەنە جولىعىپ، كوشە كەزىپ، تۇيتكىلدى جاعدايلاردى شەشىپ، ءتۇيىندى ماسەلەلەردى ىزدەپ ءجۇر.

... ءبىزدىڭ قوعامعا دا ساعى سىنبايتىن ءبىر ساردانا كەرەك-اۋ. ءبىراق سىبايلاس جەمقورلىققا بىلعانعان، كابينەتتە بيۋروكراتيالىق جۇيەنىڭ تۇتقاسىن ۇستاپ وتىرعان كىشكەنتاي شەنەۋنىكتەر جاڭاشا ويلايتىن جانداردى جۇيەگە جاقىنداتا قويار ما ەكەن؟!. ماسەلە سوندا!